Starfsemi Minjasafns Reykjavíkur

Borgarminjavörður veitir Minjasafni Reykjavíkur forstöðu og fer með minjavörslu í Reykjavík en í því felst að hafa umsjón með varðveislu menningarminja innan borgarmarkanna og eftirlit með þeim. Til menningarminja teljast munir, forleifar, gamlar byggingar og menningarlandslag og aðrar minjar um búsetu manna.  Í þjóðminjalögum eru ákvæði um hvernig háttað skal vörslu menningarminja og starfar borgarminjavörður að minjavörslu samkvæmt þeim.

Bókasafn Minjasafns Reykjavíkur er einkum ætlað starfsmönnum á safninu. Þar eru rit um sögu Reykjavíkur, sýningar- og fræðslumál á söfnum, húsvernd og húsarannsóknir, fornleifarannsóknir og forvörslu.

Fornleifadeild hefur umsjón með fornleifaskráningu og sinnir framkvæmdaeftirliti fornleifa á minjastöðum í Reykjavík og á Kjalarnesi. Deildin sinnir einnig umhverfismati vegna minjavörslu.

Húsadeild sinnir rannsóknum á byggingarsögu Reykjavíkur og gerir úttektir á einstökum húsum sem og afmörkuðum borgarhlutum fyrir nefndir borgarinnar, borgarskipulag Reykjavíkur og einstaklinga. Deildin sér um húsaskrá Reykjavíkur sem er gagnagrunnur yfir hús í Reykjavík byggð fyrir árið 1945. Borgarminjavörður gefur umsagnir varðandi breytingar, flutninga og niðurrif á húsum til nefnda Reykjavíkurborgar og húsafriðunarnefndar ríkisins. Samkvæmt þjóðminjalögum hefur borgarminjavörður eftirlit með friðuðum húsum í Reykjavík og húsum sem byggð eru fyrir árið 1918.

Miðlunardeild hefur umsjón með sýningum í safninu, bæði sýningum í safnhúsum og einnig sérsýningum. Deildin sinnir einnig öllu því sem lýtur að fræðslu og móttöku gesta. Meðal fastra liða í fræðslustarfi safnsins eru ýmsir listviðburðir og sýningar á gömlu handverki í safnhúsum. Í desember er jólasýning og jóladagskrá.

Myndasafn Minjasafns Reykjavíkur hefur verið afhent Ljósmyndasafni Reykjavíkur til varðveislu og hefur Ljósmyndasafnið tekið við þjónustu mynda úr safninu.  Ljósmyndasafnið veitir upplýsingar um ljósmyndir úr Reykjavík og pantanir á myndum og verð fyrir þá þjónustu. Heimasíða Ljósmyndasafns: Ljósmyndasafn Reykjavíkur.

Ráðsmaður hefur umsjón með safnsvæðinu á Árbæjarsafni og öryggismálum safnsins. Ráðsmaður er gestum til aðstoðar í tengslum við athafnir í kirkju og samkomur í Kornhúsi og Dillonshúsi utan venjulegs opnunartíma safnsins.

Smíðaverkstæði er rekið í safninu. Þar starfa tveir smiðir auk ráðsmanns og sinna þeir viðhaldi og viðgerðum á safnhúsum.

Skrifstofa Minjasafns Reykjavíkur er til húsa í Prófessorshúsinu frá Kleppi, nyrst á safnsvæðinu, Árbæjarsafni. Þar er almenn afgreiðsla safnsins. Starfsmenn á skrifstofu veita upplýsingar um leigu á safnkirkju, Kornhúsi og Dillonshúsi.

Varðveisludeild Minjasafns Reykjavíkur varðveitir muni sem varpa ljósi á lifnaðarhætti og daglegt líf í borginni. Unnið er að söfnun gripa eftir söfnunarstefnu safnsins, en söfnunarsvæði þess er Reykjavík og þau nágrannasveitarfélög sem ekki hafa eigin minjasöfn. Tekið er við gripum sem falla að söfnunarstefnu safnsins.